Рускиот претседател Владимир Путин го посети мостот на Крим и го прегледа во каква состојба се наоѓа. Според руската новинска агенција ТАСС, шефот на државата возел преку мостот, возејќи германски автомобил Мерцедес во друштво на вицепремиерот Марат Хуснулин. Путин возел од Таман до Крим.
Вицепремиерот му рекол на претседателот дека по експлозијата се обновуваат четири распони на мостот.
500 луѓе, 3 кранови, 4 шлепа и повеќе од 30 единици градежна опрема деноноќно работеле на реставрација на мостот. Хуснулин, исто така, му рекол на Путин дека биле потребни 55 дена за обновување на мостот, од кои 22 дена „беснеше бура, моравме да користиме уникатни технологии“.
Путин возел од десната страна на мостот и му наредил на Хуснулин да ја „доведат во совршена состојба“ левата страна на мостот.
„Левата, како што сум информиран, е во работна состојба, но сепак малку настрада“, рекол претседателот.
Портпаролот на Путин Дмитриј Песков им објаснил на новинарите дека Путин возел преку мостот на Крим со германски мерцедес, бидејќи овој автомобил бил при рака.
