Британскиот пејач, пијанист и композитор Елтон Џон се прости од британската публика во неделата вечерта на сцената на легендарниот фестивал во Гластонбери, на југозападот на Англија.
– Ова е многу посебна и емотивна вечер за мене, ова е можеби мојот последен настап во Англија, во Велика Британија, па сакам да помине најдобро, изјави Елтон Џон на почетокот на својот настап.
По отпеаните неколку големи хитови, Елтон Џон го избра својот познат хит од 1974 година „Don’t Let The Sun Go Down On Me“ да му го посвети на својот голем пријател и легенда, пејачот Џорџ Мајкл кој вчера имаше 60-ти роденден.
Елтон му ја посвети песната со трогателни зборови на својот покоен пријател кој почина на 53-годишна возраст во декември 2016 година.
– Денес е многу, многу посебен ден и се прашувам како да му пристапам. Џорџ Мајкл беше еден од најфантастичните британски кантавтори. Тој ми беше пријател, беше инспирација, а денес ќе му беше 60-ти роденден, па сакам да му ја посветам оваа песна. Целата музика што ни ја остави е толку убава. Ова е за тебе Џорџ, рекол Елтон Џон.
Потоа ги извадил своите славни очила за да си ги избрише солзите.
И тоа беше само едно од многуте изненадувања кои Елтон ги приреди на сцената на легендарниот фестивал, кој го одбележа неговиот последен настап во Велика Британија.
Песната „Don’t Let The Sun Go Down On Me“ честопати ја изведуваа заедно Џорџ Мајкл и Елтон Џон.
