Филмот „Квир“ (Queer) со Даниел Крег во главната улога, доби забрана за прикажување во Турција.
Како што пишува „Гардијан“, турските власти од областа Кадикој го забранија прикажувањето на најновиот филм на познатиот режисер Лука Гвадањин, бидејќи го сметаат за премногу провокативен и сметаат дека ќе доведе до нарушување на јавниот мир. Имено, филмот изобилува со експлицитни сцени од секс меѓу двајца мажи, а една од темите е и зависноста од дрога.
– Забраната дојде од „безбедносни причини“ – порачале властите на платформата за стриминг и на дистрибутерот „Муби“.
Сепак, оваа одлука не помина без последици. Бидејќи „Квир“ требаше да го отвори Филмскиот фестивал во Истанбул, компанијата „Муби“, која воедно е и организатор на фестивалот, одлучила да го откаже четиридневниот фестивал само неколку часа пред самото отворање, што е невиден скандал.
– Фестивалите се оази кои ги зближуваат луѓето и ја слават уметноста и културната различност. Оваа забрана за прикажување не влијае само на еден филм, туку и на значењето и целта на целиот фестивал – порачале од компанијата „Муби“.
Филмот „Квир“ ја имаше светската премиера на Филмскиот фестивал во Венеција во септември. Беше испратен со овации и ги воодушеви критичарите. Во светскиот киносали пристигнува на 27 ноември.
Даниел Крег е најпознат по улогата на тајниот агент 007 во франшизата за Џејмс Бонд.
