Финската премиерка Сана Марин изјави дека е вознемирена што видеата на кои таа танцува и пее на приватни забави се објавени на интернет, бидејќи тие се наменети само за пријателите.
Марин го изјави ова откако двеминутното видео на кое таа пее и танцува со познати локални инфлуенсери и уметници се прошири на социјалните мрежи и финските медиуми.
Исечоците првично беа објавени на приватен инстаграм-профил. Марин, која стана најмладиот шеф на владата во светот во декември 2019 година, рече дека знаела дека ја снимаат, но не мислела дека видеата ќе станат јавно достапни.
„Тие видеа се приватни и снимени во приватен простор. Замерувам што стигнаа до јавноста“, им рече Марин на новинарите. Таа додаде дека не знае кој ги препратил.
Многу Финци изразија поддршка за младата премиерка поради начинот на кој таа го комбинира приватниот живот со кариерата. Но, весникот Хелсингин Саномат пишува дека епизодата покренала прашања за нејзиното расудување.
„Марин можеби постапила со добра волја, но не треба да биде толку лековерна“, пишува весникот во уводникот.
„Премиерот може, во чувствителна ситуација, да стави оружје во информативната војна во рацете на оние кои би сакале да и наштетат на Финска“, пишува весникот.
Марин рече дека видеото е компилација од клипови од две различни прилики од пред неколку недели. Таа рече дека луѓето консумирале алкохол на забавите, но дека никој не се дрогирал, колку што знаела таа.
„Само се забавувавме, исто така на бурен начин. Танцував и пеев“, рече Марин, негирајќи ги тврдењата дека видеата се рекламен трик на помалку од една година до следните избори. Марин за Ројтерс во јануари изјави дека таа и нејзините колешки помлади министерки биле мета на чест говор на омраза поради нивниот пол и изглед додека биле на функција.
