Ретка приказна за легендарниот композитор Кире Костов се појави на социјаните мрежи. На 27 јули ќе се навршат три години од неговото заминување во вечноста.
На фотографијата споделена на страницата „Битола стари фотографии“, може да се види почитуваниот композитор, диригент и музички педагог Кире Костов, во своите помлади денови, за време на час по труба со тогаш младиот Васко Ламбевски.
Ова црно-бело сведоштво нè враќа во училниците каде што се коваше иднината на македонската забавна и сериозна музика. Кире Костов, кој со децении важеше за синоним за професионализам, и безграничен талент, на фотографијата е прикажан како будно и со силен фокус го следи секој тон на својот ученик.
Познат по својот огромен придонес како долгогодишен диригент на Танцовиот оркестар на МРТВ, но и како автор на некои од најубавите евергрини без кои не поминува ниту еден фестивал, Костов на оваа слика ја покажува и својата благородна педагошка страна.
„Кога треба да зборувам за љубовта на мојот живот е многу лесно и многу тешко. Со мојот Кире, животниот пат беше музика, возбудлива, радосна, а некогаш и тажна“, напиша Кармен Костова во монографијата за нејзиниот сопруг, славниот композитор Кире Костов која се промовираше во октомври минатата година во Скопје, а чиј издавач е таа.
Книгата ја напишаа музикологот Марко Коловски и професорката по пијано и музичка публицистика Снежана Чадиковска-Анастасова.
Љубовта на Кармен и Кире Костови започнала во Битола, кога таа имала 18, а тој 19 години. Кармен и Кире учеле заедно во средното музичко училиште. На секој одмор помеѓу часовите тој им ги свирел хитовите на „Битлси“, Арета Френклин, Тина Тарнер, Арсен Дедиќ и други. Кармен Костова е пензионирана професорка по пијано, а и нивните две ќерки се определија за музика. Нина Костова-Јаневска е пијанист и професор по пијано, а Ана Костадиновска професор по пеење и придружен вокал на повеќето македонски поп-ѕвезди и манифестаци.
На 11 ноември лани во Националната опера и балет се одржа концерт во чест на легендарниот музичар Кире Костов насловен „Летај галебе“. Познати пејачи со голем оркестар ги пееја песните кои тој ги напишал.
