Активно се занимава со пантомима од 2012 година. Негови ментори се Александар Илиев од Бугарија и Трајче Ѓоргиев од Македонија. Има настапувано на голем број фестивали на пантомима и физички театар, меѓу кои и националните: Панфиз (Македонија), со претставата „Скопје 63“, Фантомфест – Србија, Фестивал за танцов театар (Разград, Бугарија), со претставата „Еден ден, цел живот“, каде ја доби наградата за најдобар пантомимичар.
– Да се биде пантомимичар значи да се занимавате со дејност со која ќе можете да се разбирате на сите јазици во светот. Нема јазична бариера, а можете да покажете емоции, или не. Започнав со пантомимата најмногу поради тие експресии на лицето, а моѓе и тоа дека имав некаков талент, поради физичките движења. Ги обожавав Мајкл Џексон, Џим Кери, Робин Вилијамс и уште како мал почнав во драмските студиа да го надградувам мојот талент – вели Мето.
Пантомимата е уметност без зборови со која зборуваме со погледот, експресиите и движењата на телото. Во светски рамки пантомимата е ценета уметност.
– Пантомима е посебен вид на уметност, единствен начин на комуникација со надворешниот свет и други луѓе. Со превод од грчки јазик овој збор значи „оној кој ги прикажува сите”. Така, пантомимичар – еден вид на театарска претстава, во која основното значење на настанот се пренесува со гестови, а не со зборови – објаснува тој.
Од 2012 година, Мето почнува активно да се претставува со пантомимата кај нас. Своја улога имал во разни видео записи, реклами, но својата точка ја споделува и на детските родендени и прослави.
– Секогаш изнудувам насмевка на лицето и што е најдобро сите ме разбираат иако не зборувам. Пантомимата е ретка кај нас и на прсти можат да се избројат луѓето во Македонија што го прават ова. Дури и мои колеги артисти се фокусираа на други работи, поради тажниот период во кој живее човештвото сега – раскажува Мето.
На Фестивалот за танцов театар (Разград, Бугарија), со претставата „Еден ден, цел живот“, ја доби наградата за најдобар пантомимичар.
– Треба да се работи многу, да се вежба пантомимата, но треба да се поседува и дарба и креативност. Ако не сум интересен нема да го задржам вниманието на детето, тогаш јас не сум задоволен, а ни децата нема да го добијат тоа задоволство кое го очекуваат. Со пантомимата ја будам насмевката и позитивната енергија која ја поседуваат децата. Ако јас не верувам дека постои срце во мојата рака, никој нема да ми верува. Пантомимата не е страшна, може да ме гледаат и разбираат деца од 2 годишна возраст па до тинејџерите – објаснува Мето.
Досега никој не му се налутил на Мето, напротив задоволние и насмеани лица го поттикнуваат да продолжи понатаму.
– Сите сакаат да се сликаат со пантомимичарот онаму каде што настапувам. Јас за нив сум еден позитивен лик кој ја менува атмосферата и расположението кај луѓето.
Постои и Светски ден на пантомимата, познат и како Меѓународен ден на пантомимата – ден посветен на мимиката, пантомимата, немиот филм и невербалната комуникација, кој се одбележува на 22 март, денот на раѓањето на познатиот француски глумец и мимичар Марсел Марсо. Според Светската организација на пантомимичари, со овој ден пантомимата се празнува како “јазикот на мирот”.
