Легендарниот српски телевизиски и филмски сценарист и истакнат писател Синиша Павиќ почина на 92-годишна возраст во сон, потврди неговиот син.
– Можам да потврдам дека татко ми почина. Почина во сон од старост на 92 години. Не можам да ви кажам ништо повеќе. Би ве замолил да ја почитувате нашата приватност во овој тежок момент – изјавил Владимир за српски „Информер“.
Синиша Павиќ беше српски сценарист и автор на бројни серии кои сè уште се емитуваат на телевизија.
Некои од нив се: „Подобар живот“, „Среќни луѓе“, „Пристигнуваат доларите“, „Театар во куќата“, „Жежок ветар“, „Дипломци“, „Белиот брод“ и најпознатата и за многумина омилената „Семејно богатство“.
Павиќ ги напиша и сценарија за култни филмови како: „Отпишаните“, „Тесна кожа“, „Тесна кожа 3“, „Тесна кожа 4“, „Лав во срце“.
Павиќ дипломирал на Правниот факултет во Белград во 1956 година.
Телевизискиот и филмски сценарист, како и истакнат писател, е добитник на престижната награда „Доситеј Обрадовиќ“ во 2021 година.
Лауреатот Синиша Павиќ не можел лично да ја прими наградата поради болест, а неговиот син – Владимир Павиќ, професор на Правниот факултет – ја примил наградата Доситеј Обрадовиќ.
Синот го прочитал говорот на својот татко, во кој вели дека ова е голем ден во неговиот живот, дека му е огромна чест што е добитник на наградата што го носи името на Доситеј Обрадовиќ, но дека поради виша сила бил спречен лично да присуствува на настанот.
