Пејачката Јасна Бошњаковиќ, која се прослави со учеството во мизичката емисија „Никогаш не е доцна“, починала синоќа на 48-годишна возраст во Ужице.
Како што пишуваат српските медиуми, пејачката се борела со рак на крајниците, поради кој летово и се оперирала, но состојбата наеднаш ѝ се влошила.
Веста за ненадејната смрт на пејачката ги погоди нејзините колеги натпреварувачи, како и колегите кои со години работеле со Јасна.
Јасна се прослави по учеството во шоуто „Никогаш не е доцна“, за кое се пријавила на 43 години, а пред натпреварот работела на различни работни места.
Последниве години живеела од пеење и најмногу работела во родниот град Ужице.
Таа почна да пее доцна и сосема случајно.
Додека работела во ресторан, на пауза го грабнала микрофонот и оттогаш не го пуштила.
По натпреварот Јасна продолжила да се занимава со музика, а и покрај лошата здравствена состојба не се откажала од пеењето, ниту по операцијата.
– Закрепнувањето оди полека, веројатно ќе бидат потребни седум-осум дена се да се врати во нормален тек. Тешко голтам – изјавила таа за „Гранд“ летоска, додавајќи:
– За еден месец сè треба да се врати во нормала. Што се однесува до пеењето, кога ќе се опоравам и ќе се чувствувам подготвена, ќе пеам. Полека, не се брзам, така ми вели и докторот.
Јасна во интервјуто за српските медиуми признала дека имала тешко детство, но дека никогаш не се откажала и дека вербата ѝ помогнала во најтешките моменти.
– Пораснав во Ужице со родители кои починаа млади. Мајка ми почина кога јас бев седмо одделение, а татко ми кога јас одев во средно училиште. По смртта на мајка ми, татко ми се ожени, па јас и брат ми пораснавме со нашата маќеа – рекла поранешната натпреварувачка и додала дека родителите често ѝ недостасуваат.
