Хрватската актерка и пејачка Лукреција Брешковиќ почина денеска на 84-годишна возраст. Уметницата се школувала во Дубровник, а дипломирала солистичко пеење на Музичката академија во Загреб. Започнала да настапува како студентка како член на ансамблот „Музика нова“ и како солист во загрепскиот театар „Комедија“, пишува „Вечерњи лист“.
Со ислучителна музикалност и сценски ефективна актерска игра, таа прво изведувала споредни улоги, а потоа почнала да добива и улоги, во познатите оперети како „Сплитски акварел“ од Иво Тијардовиќ и „Грофицата Марица“ од Емерих Калман.
Нејзината кариера ја одбележаа многу телевизиски и филмски улоги, а една од нив е улогата на добрата слугинка Магда во серијата „Вила Марија“, која се емитуваше и во Македонија пред дваесетина години.
„Омилен период ми беше од 70-тите до 80-тите години, што беше златното доба на хрватските мјузикли и пеев во секој од нив. Уживав. Бев учесник во нешто што штотуку се создаваше со прекрасна екипа предводена од Владо Стефанчиќ, а секоја премиера беше светска премиера. Ги поминав сите жанрови.
Почнав со оперета, пеев во комични опери, потоа ме апсорбираше телевизијата, каде бев актерка во филмови и серии, а интензивно ја проучував и современата музика. Навистина одев на сè. Сè што ми преостанува е да се обидам да бидам кловн. Не сум го пробала тоа, но сакам затоа што ме возбудуваат“, рече таа во интервју за „Вечерњи лист“ во 2014 година.
