РТЦГ (Радио телевизија на Црна Гора) соопшти дека оваа држава ѝ се враќа на Евровизија. Кој ќе ја претставува Црна Гора на Евросонг 2025 ќе се одлучува преку натпревар што ќе го носи името „Монтесонг“.
Црна Гора официјално објави дека се враќа на Евровизија. Нивниот национален радиодифузер РТЦГ потврди на својата официјална веб-страница дека земјата ќе се врати на Евросонг по пауза од две години.
Исто така, официјално е најавено дека Црна Гора ќе одржи национално финале за избор на изведувачи за 2025 година наречено „Монтесонг 2024“.
На почетокот на овој месец, РТЦГ објави документ во кој се опишуваат нивните планови за Евровизија 2025 година, вклучително и ново национално финале. Меѓутоа, вчерашната изјава е прва официјална потврда за учеството на Црна Гора на натпреварувањето следната година.
Во своето соопштение, РТЦГ наведува дека нивното враќање на Евровизија „е поради развој и унапредување на музичкото творештво во земјата“.
Од РТЦГ велат дека националниот избор ќе го следи досегашниот систем на гласање на Евровизија: 50 отсто од бодовите ги доделува „стручно жири составено од еминентни музички и медиумски творци“, а останатите 50 отсто од публиката.
Телевизијата повторно ги изнесе и правилата за „Монтесонг 2024“, но тие се главно непроменети во однос на тоа како беа напишани во минатонеделниот документ. Едно од појаснувањата е дека авторите, односно текстописците, не мора да се државјани на Црна Гора, туку изведувачите на нивните песни мора да бидат.
Црна Гора дебитираше на ова натпреварување во 2007 година.
Оттогаш, трипати паузираа од Евровизија, одлучувајќи да не се натпреваруваат во периодот од 2010 до 2011 година, се повлекоа од откажаното издание во 2020 и 2021 година, а од натпреварот се откажаа во 2023 и 2024 година поради високите трошоци.
Црна Гора последен пат учествуваше во 2022 година со Владана и нејзината песна „Breathe“.
