Татјана Миоковиќ, кумата на Лепа Брена, таканаречената „кралица на естрадната автомобилска мафија“, која беше обвинета од Јавното обвинителство за организиран криминал во Белград дека таа и нејзиниот невенчан сопруг Зоран Јанковиќ и уште шестмина обвинети учествувале во трговијата со скапи автомобили што биле украдени во странство, осудена е пред Специјалното одделение на Вишиот суд во Белград на две години и два месеци затвор, како и парична казна од 300.000 динари.
Нејзиниот невенчан сопруг Зоран Јанковиќ е осуден на шест години и шест месеци затвор, како и парична казна од еден милион динари. Како што потврдиле за српски „Курир“ од Јавното обвинителство за организиран криминал, на повеќегодишна затворска казна се осудени и останатите обвинети опфатени во обвинителниот акт.
Обвинетиот Милан Јариќ е осуден на три години и осум месеци затвор, како и парична казна од 400.000 динари, Бошко Тарајиќ на пет години и четири месеци затвор и парична казна од половина милион динари, Золтан Молнар на две години и четири месеци затвор и парична казна од 100.000 динари, Младен Мишчевиќ и Иван Ќириќ на три години и шест месеци затвор и парична казна од по 300.000 динари, а Горан Ловриќ на три години затвор и парична казна од 100.000 динари.
