Домашните туристи годинава се жалат на цените во Охрид кој е доста поскап во однос на минатата година.
Многумина коментираат дека цените во нашиот најпопуларен туристички град се „морски“, и нема голема разлика од цените на Халкидики во Грција.
Кафе во познатите барови покрај езеро чини од 120 денари па нагоре, а во стариот дел на Охрид, еден турист од Скопје ни раскажа дека платил 180 денари за студено инстант кафе. Соковите во центарот на градот, во чаршијата и во популарните локали на кејот се 150 денари, пивото од 150 па нагоре.
-Во Ханиоти во Грција, во бар на плажа земав кафе за носење за едно ипол евро. Во Охридската чаршија, кафе за носење чини исто толку, 90 денари. Не го потценувам Охрид, но годинава се претера со цените. Дојдовме само на викенд со семејството, и не можевме да си дозволиме да јадеме во ресторан како претходни години. Се гледа дека цените се прилагодени за странските туристи, на наша штета“, ни изјави еден турист од Скопје.
Охридски појадок на пример чини дури 400 денари. Таа цена е за две парчиња леб, две јајца „на око“, чадено пилешко, кашкавал или сирење и маслинки. Исто толку пари, 400 денари чинат пржени лепчиња. Во оваа порција се добиваат четири лепчиња со сирење, ајвар и маслинки. Сендивичите во еден ресторан на охридскиот кеј чинат од 450 до 750 денари, а бургерите се од 550 до 600 денари. Охридски појадок се нуди и за 300 денари, со омлет и охридски варен ѓеврек.
Тестенините во ресторан кој е исто така на охридскиот кеј чинат од 370 до 470 денари, лазањите 450, рижото со морски плодови 570.
Килограм охридска пастрмка е 2900 денари, а килограм белвица и крап е 1900 денари. Морска даска за 4 лица чини 4.200 денари.
И продавачите на пченка ги зголемија цените двојно во однос на минатата година. Едно парче варена или печена пченка чини 100 денари.
Изнајмувањето на лежалки на плажите е иста цена како и лани, од 150 до 200 денари. Целодневен билет за паркинг на познатите плажи надвор од Охрид е 200 денари.
