Европскиот парламент ќе спроведе внатрешна истрага по апсењето на потпретседателката Ева Каили како дел од истрагата за корупција. Ова го соопшти претседателката на Европскиот парламент Роберта Мецола.
Како што истакна Мецола, никој во Европскиот парламент нема да „стави ништо под тепих“.
„Ќе започнеме сопствена внатрешна истрага за да ги откриеме сите факти поврзани со парламентот во овој случај и да разбереме како да ги зајакнеме нашите сопствени системи“, рече Мецола.
Според нејзиното мислење, повеќе не е можно да се води бизнис на ист начин како што беше пред овој инцидент.
Во врска со корупцискиот скандал таа побара и преглед на извештајот за визното олеснување со Катар и Кувајт.
Претходно на грчката политичарка Ева Каили ѝ беше одземена функцијата потпретседателка на ЕП поради антикорупциската истрага во која се смета за осомничена.
Обвиненијата против Каили и уште три лица се поврзани со Светското првенство кое во моментов се одржува во Катар.
