На првата вечер од 33. издание на „Охрид фест-Охридски трубадури“ блесна сцената кај Долни Сарај, а на неа меѓу бројните изведувачи се претстави и популарната Анета Љумаковска со својот бенд „Анета Бенд“. Песната „Срцево те бендиса“ се издвои од останатите, а ритамот, мелодијата и текстот веднаш влегуваат во уво.
По нивниот настап несомнено беше дека нема да заминат со празни раце, па така ни помалку ни повеќе, бендот си замина со прва награда.
Пејачката ја сподели радоста со јавноста.
Со огромна радост и гордост споделуваме дека од настапот на Охрид Фест се враќаме со ПРВА НАГРАДА! Ова признание за нас е уште една потврда дека љубовта, трудот и посветеноста кон музиката секогаш го наоѓаат својот пат. Благодарност до целиот тим, организаторите на Охрид Фест, композиторите на оваа песна. до сите кои веруваа во нас, ни дадоа поддршка и беа дел од ова прекрасно музичко патување. А најголемо благодарам до вас, нашата публика – без вашата љубов и поддршка, секоја награда би била помалку вредна. Охрид, оваа ноќ ќе ја паметиме засекогаш! – напиша таа на профилите на социјалните мрежи.
Тимот кој работел на оваа композиција се состои од веќе докажани имиња на музичката сцена. Текстот е напишан од перото на Анита Даева, а за музиката и аранжманот се погрижи Зисо Пуровски.
Песната има забавна мелодија, а текстот е автентичен и ја опева љубовта на млада девојка кон тапанар од Варош маало во Охрид.
Љумаковска блесна на сцената во преубава елегантна креација во црна боја збогатена со илјадници сребрени циркони и синџирчиња. Гламурозните лелеави ретро ракави го надополнија спојот на минатото и сегашноста. Едноставно, ова беше нејзина ноќ.
Додека се случуваше настапот пејачката неколку пати суптилно се сврте кон музичарите и му упати љубовни погледни на сопругот, музичарот Рубин Размо, со кого се заедно во бендот.
