Убиецот кој направи масакр во основно училиште Тексас, работел во Вендис, синџир американски ресторани, во ресторан недалеку од местото на масакрот.
Неколку часа пред да го изврши масакрот во основното училиште во Увалде, Тексас, убиецот испратил криптична порака до непозната жена на Инстаграм во која напишал: „Штотуку ќе…“ – пренесуваат американските медиуми, подвлекувајќи дека на Инстаграм Салвадор Рамос бил познат како „Salv8dor_“.
На неговиот профил, блокиран веднаш штом беше објавено неговото име, тој објавил селфи и други фотографии од оружје, вклучително и една со две пушки една до друга.
Криптичната порака е испратена до непозната девојка која не живее во Тексас. Убиецот ја контактирал на 12 мај и ѝ рекол да ги „репостира“ фотографиите од пиштолите. На пораката „I’m about to …“, испратена во 5.43 часот во вторник, девојката одговорила со: „Што?“.
Убиецот ѝ одговорил: „Ќе ти кажам пред 11“.
Еден час подоцна повторно ѝ напишал: „Имам мала тајна што сакам да ти ја кажам“. Неговата последна порака до девојката била во 9.16 часот.
Убиецот наводно испратил и фотографии од оружје и муниција на поранешен негов соученик.
„Ми испрати фотографија од пушка АР-15 што ја користеше со муниција“, рекол соученикот, известувајќи и дека Рамос бил исмејуван од другите средношколци за облеката што ја носел и за финансиската состојба на неговото семејство.
Убиецот работел во Вендис, американски синџир ресторани со продавница недалеку од местото на масакрот. „Беше тивок, не зборуваше многу и не се дружеше со другите вработени“, рекол менаџерот на ресторанот, Адријан Мендес.
