Речиси и да не постои човек кој не ја сака музиката на Ѓорѓе Балашевиќ. Неговата поезија ја лечи душата, гали и милува. Како еден од најголемите кантавтори од овие простори – ако не и најголемиот – тој напиша огромен број песни што станаа безвременски. Стиховите што ги има напишано тој се нешто на кое не се останува рамнодушен, па не случајно секоја негова песна се претвори во евергрин.
Еден од најпрепознатливите хитови на Балашевиќ несомнено е „D-Mol“ (Д-мол). Дали знаете како настанала оваа песна?
„D-Mol“ е објавена во 1989 година, а во една прилика, Ѓоле објасни како настанала оваа песна.
„Јас сум таен депресивец. Еднаш реков – ’денес сум наштиман на руски начин’ – израз што ретко се користи денес, а опишува тажно и меланхолично расположение – ’денес сум во мол-скала, но не во Г-мол, туку во темно син Д-мол’. Тоа се случува во моменти на копнеж по некој што, во тој конкретен миг, не мора нужно да биде далеку“, рече своевремено Балашевиќ.
Тој додаде дека не мора да одиш некаде далеку за да копнееш по некого :
„Ѝ реков на сопругата Оља: ’Не морам да одам во Австралија за да копнеам по тебе оттаму. Тоа може да се случи и кога си на пазар, или понекогаш додека едноставно спиеш’. Значи, ’D-Mol’ е песна за копнежот; и иако тој збор всушност никогаш не се спомнува во текстот, секогаш кога се изведува на концерти, сите меланхолични души во публиката веднаш се поистоветуваат со неа“, изјави Балашевиќ, пренесе balasevic.in.rs.
