Разговараме со Васка Илиева, по професија шивачка, која во слободно време со љубов се посветува на одгледување цвеќиња и се занимава со правење превкусни бели печива. Со одгледување на цвеќиња се занимава од многу одамна, од пред околу 20 години.
Дворот се наоѓа во сончевата Гевгелија, кадешто живее семејството, и доста е голем за да ги собере сите украси и цвеќиња и да овозможи на семејството релаксирано уживање. Во овој двор, Васка го пронаоѓа својот мир и спокој и вели дека тоа е причината за којашто голем дел од животот посветува на цвеќињата.
– Јас сум одговорна за уредување на дворот во нашиот дом, но понекогаш ми помага и мојот сопруг. Премногу сум му благодарна бидејќи тој го направи украсното бунарче со цвеќиња и секогаш ме поддржува во идеите за украсување на дворот – ни открива Васка.
Во дворот доминираат сарделите кои ги има во повеќе бои. Сите се прекрасни и се полни со цвет. А има и многу бегонии, како и розички лаванда, борчиња, сукуленти и други растенија. Дома пак, Васка има собни цвеќиња. Во нивниот двор имаат и посебен дел за овошки – јаболка, јаготки, малини, капини и лимон.
– Оваа убавина, во летните периоди бара повеќе посветеност во еден ден. Кај нас во Гевгелија е многу топло во летно време, па сите цвеќиња бараат повеќе вода и повеќе посветеност и можам да кажам дека сето тоа ми опфаќа околу два часа дневно ангажираност во попладневните часови.
Повеќето од цвеќиња во овој двор се издржливи на потопло време.
– Сарделите, алое вера и драцената бараат шарена сенка, додека пак бегониите и бугенфилиите сакаат повеќе сонце. Кога започнуваме со одгледување на цвеќиња мораме да им ја прилагодиме средината која што ја бараат – објаснува Васка.
Ја прашуваме кој е нејзиниот најголем предизвик кога дворот е во прашање?
– Најголемиот предизвик кога дворот е во прашање е, секогаш дворчето да ми биде средено, а цвеќињата да се секогаш добро негувани – ни одговара.
За крај, еден градинарски совет за оние кои сакаат да почнат со одгледување на цвеќиња, од кои цвеќина да почнат?
– Советот кој можам да го споделам со оние кои сакаат да започнат со одгледување на цвеќиња е да започнат со одгледување на поотпорни цвеќиња, како што се лавандата, некои сукуленти, пустинската и камената рожа, палмите, односно сите растенија коишто не мрзнат, коишто се повеќегодишни и се издржливи – советува госпоѓа Илиева.
Инаку, Васка е членка на Фејсбук групата …ДВОРЧЕТО…, група која ви ја препорачуваме да си станете член и да се изнагледате преубави објави!
Уживајте во фотогалеријата.
Фото – приватна архива
(Фото сторија) Во село Добрушево сè е толку добро и со душа, па така и дворот на Марина
