Веста дека почина Саша Поповиќ одекна во регионот. Првиот човек на „Гранд“ продукција Саша Поповиќ почина по кратко и тешко боледување во саботата, на 1 март.
Неговата сопруга Сузана Јовановиќ сега првпат се огласи по повод смртта на својот сакан сопруг. Таа се заблагодари на сите кои ѝ изјавија сочувство и се во длабока тага по веста дека Саша ја загуби битката со ракот:
„Им благодарам на сите добри луѓе кои изразија сочувство и сочувствуваа со нас во нашата болка. Семејството Поповиќ“, напиша кратко Сузана.
Со истите зборови на социјалните мрежи се огласи и ќерката на Сузана Јовановиќ и Саша Поповиќ, Александра, исто така во име на целото семејство.
За потсетување, основачот и креативен директор на Гранд продукција, Саша Поповиќ, почина на 71-годишна возраст по кратко и тешко боледување во Париз.
Веста дека почина Поповиќ ја објави „Гранд“ продукција.
„Со голема тага ја информираме јавноста дека денеска по кратко и тешко боледување почина Александар Саша Поповиќ, основач и креативен директор на Гранд продукција“, се вели во соопштението.
Саша Поповиќ беше миленик, како меѓу колегите и соработниците, така и меѓу пејачите, што не е чудно со оглед на неговото долгогодишно работење со естрадата.
Александар Саша Поповиќ е роден на 24 април 1954 година во Нови Сад. Низ децениската работа, тој беше визионер и посветен професионалец. Преку музиката и телевизијата, тој откри и поддржа бројни таленти, обликувајќи го звукот и духот на една ера.
