Од нив 53 се тешко повредени, околу 350 војници на Азов останале во челичарницата. Дожд од проектили ноќеска над Лавов.
Нема примирје во Украина, војната продолжува и минатата вечер Русите го нападнаа Лавов, градот на границата со Полска на крајниот запад од земјата. Ова е најмасовниот ракетен напад од почетокот на конфликтот – објавија украинските медиуми.
Војниците кои ја бранеа челичарница како последно украинско упориште во градот Мариупол, ја прогласија мисијата за завршена, откако повеќе од 260 од нив, вклучително и некои тешко ранети, беа евакуирани и одведени во областите под руска контрола.
Украинскиот претседател Володимир Зеленски изјави дека евакуацијата на територијата контролирана од сепаратистите била направена за да се спасат животите на борците кои издржале недели на напади во лавиринтот на подземните премини под челичарницата Азовстал.
„На Украина ѝ требаат живи херои“, продолжи Зеленски, „Потребно е време да се вратат дома“.
Во моментов не е јасно колку војници од Азовскиот полк се оставени и чекаат помош, и дали ќе има напад од страна на Русите.
