Музичарот Бора Ѓорѓевиќ попознат како Бора Чорба ќе биде погребан во сабота на 7 септември во 14:30 часот на Градските гробишта во Чачак, соопштија од кабинетот на градоначалникот на Чачак.
По повод смртта на музичарот, во петок на 6 септември во Чачак ќе биде прогласен ден на жалост. На тој ден ќе се одржи комеморација во Домот на културата.
Бора е роден во 1952 година во Чачак. Таму завршил основно и средно училиште. Пред две години Собранието на Чачак му ја додели титулата почесен граѓанин.
Бора Ѓорѓевиќ, фронтменот на „Рибља Чорба“, почина на 4 септември во Љубљана.
„Драги пријатели, со тага и жалење ве известуваме дека нашиот пријател и брат, Борисав Бора Ѓорѓевиќ не напушти. Почивај во мир драг наш Боки“, соопштија од групата.
Најпрво поради тешко воспаление на белите дробови заврши во болница во Љубљана, а потоа состојбата му се влоши и беше ставен на вентилатор. Групата претходно ги откажа сите настапи поради неговата здравствена состојба.
