Тони Бијелиќ (51), поранешен сопруг на српската пејачка Драгана Мирковиќ, во понеделникот доживеа сообраќајна несреќа во Опатија, пишува српски „Скандал“, кој објави и фотографија од уништениот автомобил. Тој го возел својот блиндиран ролс-ројс, вреден околу половина милион евра, на кој е направена огромна материјална штета.
Според информациите што ги објави „Скандал“, Тони во моментот на несреќата не бил сам во автомобилот, но за среќа, никој не е тешко повреден.
– Тони не бил сам во автомобилот во моментот на несреќата, но за среќа, никој не е тешко повреден. Бизнисменот е исто така добро, но е изнервиран од сè што се случи, не толку поради оштетувањето на автомобилот, колку поради фактот дека можело да дојде до трагедија – пренесува „Скандал“.
Камион со кран пристигнал на местото на настанот за неколку минути и го однел автомобилот на Тони во Виена, додека Бијелиќ заминал со пријателите кои дошле да го земат, пишуваат српските медиуми.
Проценетата штета на автомобилот е околу 100.000 евра, пренесува српски „Телеграф“.
Според соопштението на Полициската управа Приморско-горанска, возачот на германското возило, за кој се претпоставува дека е Тони, удрил во паркирано возило, изгубил контрола и удрил во уште два паркирани автомобили.
Полицијата на местото на несреќата затекнала 51-годишен државјанин на Австрија, кој изјавил дека бил патник во возилото, додека возачот го напуштил местото на настанот без да остави податоци за контакт.
– Затекнатото лице изјавило дека било сопатник во наведеното возило, а дека возачот го напуштил местото на настанот без да остави свои податоци и информации за возилото на сопствениците на оштетените возила. Во сообраќајната несреќа нема повредени лица. Следниот ден, во Полициската управа Опатија се обратиле 51-годишен државјанин на Австрија и 36-годишен државјанин на Србија, кој на полицијата ѝ рекол дека управувал со наведеното возило и ја предизвикал0 сообраќајната несреќа – се наведува во соопштението, пренесе „Телеграф“.
– Со понатамошната кривична истрага е утврдено дека сторител на сообраќајната несреќа е 51-годишен маж, како и дека тој управувал со возилото под дејство на алкохол од 1,66 г/кг и е прекршочно санкциониран по одредбите од Законот за безбедност на сообраќајот на патиштата, додека 36-годишниот во моментот на сообраќајната несреќа бил надвор од Република Хрватска. Осомничениот 36-годишник поради сомнение дека сторил кривично дело давање лажен исказ е кривично пријавен до надлежното државно обвинителство – стои во соопштението, како што пренесува „Телеграф“.
