Додека некои идни или новопечени родители поминуваат часови пребарувајќи списоци со имиња и размислувајќи за семејните традиции, други се подготвени да издвојат десетици илјади евра за да го препуштат тој избор на професионалци. Токму таква услуга нуди сè популарната индустрија – професионални „именувачи“ на бебиња.
Едно од најпознатите имиња во овој необичен бизнис е Тејлор Хамфри, која препозна пазарна идеја и ја претвори во профитабилен бизнис. Нејзината услуга може да достигне вртоглави 26.000 евра за избор на совршено име за дете, иако нуди и поевтини пакети од неколку стотици евра.
Индустријата за именување бебиња постои веќе повеќе од една деценија, но последниве години бележи значаен раст. Хамфри ја започнала кариерата како дула, нудејќи емоционална и практична поддршка за време на бременост и породување. Со зголемувањето на нејзината популарност на социјалните мрежи, сè повеќе луѓе ѝ се обраќале за совети околу имиња, што на крајот прераснало во работа со полно работно време.
Како што пишува The New Yorker, нејзиниот прв пакет чинел 1.300 евра и бил претставен на инвеститорите на ексклузивна вечера. Денес, Хамфри е своевиден „онлајн оракул“ за имотни семејства кои сакаат уникатно и внимателно избрано име за своето дете.
Иако многумина го сметаат овој бизнис за едноставен или дури неозбилен, Хамфри тврди дека реалноста е поинаква. Во разговор за San Francisco Chronicle, таа посочила дека нејзината работа често вклучува итни ситуации. Се присетила на пар кој не можел да ја напушти болницата додека не одлучи за средното име на детето, бидејќи подолг престој ќе им носел високи трошоци. Тогаш таа брзо интервенирала и го решила проблемот, секако со соодветен надомест.
Процесот на избор на име далеку е од случаен. Родителите пополнуваат детална анкета за своите интереси, личност и семејно потекло, врз основа на која Хамфри изготвува предлози. Нејзиниот најевтин пакет, кој чини околу 175 евра, вклучува список со имиња со нивното значење, потекло, популарност низ годините, но и, како што вели, нивната „вибрација“.
Од друга страна, премиум пакет од 26.000 евра вклучува ангажман на професионални генеалози, експерти за брендирање, повеќемесечно планирање и консултации со Хамфри преку телефон или онлајн состаноци.
Самата Хамфри е свесна дека нејзиниот бизнис често предизвикува потсмев.
Знам дека луѓето мислат дека е малку смешно, и се согласувам, но верувам дека она што го правам е важно – признава таа.
Додека едни сметаат дека плаќање десетици илјади евра за име на дете е претерано, други тоа го гледаат како вложување во идентитетот и иднината на своето дете.
View this post on Instagram
