Со музичарот Џина Папас Џокси уживаме во неговата гастро азбука, чувајќи го споменот од детството – ванилиците.
A – Афион – Се давам во штрудла од афион. Незаборавно чувство. Па со една чаша топло млеко, заспиваш на прва.
Б – Боров мед – Затоа што го сакам тој вкус. Пробајте.
В – Ванилици – Спомен од детството, мајка ми ги правеше.
Г – Грав – Па уште на тавче со подлога од кумановска трева. Бооооооо … !!!
Д – Диња, дуња, дудинки – Не умирај пред да ги вкусиш.
Ѓ – Ѓумбир – Често го користам зачинов во замена за бибер.
Е – Ебамија – Бамија набавена по електронска пошта, за турлитава душа дава …
Ж – Жгањци – Едно подзаборавено јадење во комбинација со листови сланина и павлака, прсти да излижеш.
Ѕ – Ѕуни – Кога гледам прасечко ми ѕуни во ушите, како да компонирам. Мора и вам да ви се случило.
И – Иверка – Морска риба која бара специфична подготовка, се консумира само варена (лешо) со морка салата.
Ј – Јајца – Ровките ми се специјалитет. Ај да не ви раскажувам како ги јадам.
К – Качамак – Ама оној од Трница, со парче овчо сирење.
Л – Лубеница – Најдобриот природен антиоксидант, мочаш на секои 5 минути
Љ – Љубица – Тетка ми, на мајка ми сестра, уште не ми збори, еве 30 години (нејзината сарма закон)
М – Малини – Во состојба сум еден помал овоштарник да смачкам за еден ден. (Маџун – ама домашен)
Н – Налани – Често со нив одам на пазар. Кога ќе ги „расчукам“ од асфалт, уште од Градежен тезгаџиите знаат дека идам. (Наутот додадете го во која било салата, но може и во манџи, на пример во грав)
Њ – Њоки – Полнети њоки со сливи. Што да ви кажам, да ги направам па да пробате
О – Орхидеја – Најеротскиот цвет. Се употребува пред секоја сеанса. (Оморика – Еден вид бор. Душа давам за прошетка по таква шума. Овален сад – Одлични се за подготовка на разни салати, но и за главни јадења)
П – Пиперка – Едно домашно растение кое буди возбуда само штом ќе го погледнеш. Сировата е најхранлива во комбинација со патлиџан и сирење. (Домашно направена ПАЧА со лукче.)
Р – Рукола – Немам утнато ручек без салата од рукола. (Рогачот е вкусен кога наесен ќе се набере, онака цел, не во прав).
С – Суша – Најголемиот непријател на растенијата и животот во Светот. (Смоквата ми е најеротско овошје, Скушата е исто вкусна риба особено онаа сушената)
Т – Трева – Најубаво место за опуштање по одредени движења со партнерката/партнерот
Ќ – Ќуп – Глинен сад во кој баба ми ставаше саламурено месо. Еднаш ми спомна дека дедо ми заѕидал еден таков полн со златници, ама никако да го најдам ѕидот …
У – Урми – Едно тропско овошје од кое правам торта урмашица … Мммммммм … ( Немој да сте ми нарачале)
Ф – Фстаци – Апетисани кои ги јадам само сирови.
Х – Хумус – Хумусот не како ѓубриво, туку јадење.
Цвекло – Се јаде во каква било обработка, но јас од него правам и природни бои за цртање
Ч – Чорба – Секаква. Обожавам говедска со целер, морков, брокула и карфиол
Џ – Џимиринка – Џимиринката е месниот дел од чварката, но почитувам да се од домашно производство и не многу солени
Ш – Шафран – Зачин кој редовно го користам. Им дава на супите карактеристичен вкус. Инаку, антиоксидант е.
