Денес разговараме со Венера Самарџиева, по професија фармацевт, сопственичка на приватна аптека во Гевгелија. Со оглед на тоа што нејзината работа со луѓе бара многу пожртвуваност и енергија, по наподниот работен ден госпоѓа Венера уште со првиот чекор во дворчето чувствува нова енергија. Вели дворчето ѝ ја облагородува душата.
Нашата соговорничка е голем љубител на природата.
– Уште како дете секојдневно беревме сини темјанушки од полјанките, правевме букети од јорговани и ги носевме во нашите домови каде прекрасно мирисаа. Таа љубов уште повеќе се зголеми запознавајќи го мојот сопруг, кој е страствен обожавател на убави цвеќиња и сакајќи да го израдувам, го купував секое ново, интересно цвеќенце на кое ќе наидев. Во цвеќињата ние го наоѓаме нашиот мир и спокој и еден друг свет во кој ги нема секојдневните стресни ситуации од современото време, вака ја започнува Венера својата цветна приказна.
Кој е одговорен за уредување на дворот во вашиот дом?
– Комплетната нега на цвеќињата и овошните дрвца кои ги поседуваме е на мојот сопруг Јован. Тој по професија е професор по англиски јазик, но негова пасија е убавото цвеќе и вкусните плодови, за кои неуморно се грижи во секој период од годината. Летото, кога го користи годишниот одмор, комплетно се посветува на дворот и градината и произведува органски плодови, смокви, малини, капини, јагоди, рибизли, аронија, гоџи бери, така да во секој период од годината имаме вкусни плодови од кои правиме и ладно цедени сокови кои ги складираме во стаклена амбалажа.
Со колкава квадратура располага дворот?
– Има прилично голема површина, која е поделена на два дела. Во првиот дел се наоѓа куќата и дворот со украсни растенија, а вториот дел е градина во која имаме разновидни овошни дрвца, меѓу кои и некои раритети како кинеска урма, сибирско голо киви, калинки, цреши, кајсии и слично.
Јас како фармацевт, во нашиот двор вметнав и голем број лековити и украсни растенија, кои ни го красат дворот, но ни претставуваат и вкусна храна, напиток и лек. Имаме пасифлора која ја краси нашата ограда, а чии плодови се прекрасен лек за заспивање и смирување. Лавандата е препознатлива за нашето дворче и е распространа од двете страни на патеката кон нашиот влез. Имаме и жалфија, рузмарин, маточина, чии мирисни листови се омилен напиток на цело семејство. Нането неконтролирано ни се размножува, па како суви листови си го собираме и го користиме како зачин за цела година. Оваа година, во градината за првпат засадивме и горка диња, која ни даде прекрасни плодови.
Кои цвеќиња и растенија доминираат?
– Ние си ги бираме цвеќињата во зависност од местото каде треба да стојат, па така каде и да се завртиме, уживаме во нивната убавина. Имаме високи и ниски зимзелени борчиња, колаж од неколку зимзелени растенија во различни бои, палми, индиски јорговани во црвена и розева боја, различни бои на ружи, хризамтени, пламенчиња, хортензија, гладиоли и други. Од саксиски цвеќиња имаме бенџамин, кој е висок 2,5 метри, драцена околу 2 метри, хибискус, бугенвилии во розева, црвена и бела боја, каланхое во жолта и црвена боја, телеграфче, кумкват, азалеа, неколку видови кактуси, исусов венец.
Колку време дневно бара посветеност оваа убавина?
– Во летниот период, поради високите температури кои ги имаме кај нас, оваа убавина бара поголема посветеност и секојдневно наводнување, па за да си ги олесните обврските онаму каде е можно, поставивме систем капка по капка која многу ни ја олеснува работата. Направивме и бушотина и имаме вода за наводнување на градината. Кога се пониски температурите, времето одвоено за нега не се ни забележува.
Кое е вашето омилено цвеќе и зошто?
– Секако, омилени ни се сите цвеќиња кои ги имаме, меѓутоа специфични за нашиот топол крај се бугенвилијата и индискиот јоргован чии цветови нè облагородуваат во текот на целото лето. Задоволство е само да поминете покрај нив и да почувствувате прекрасна топлина и позитивна енергија која ви ја гали душата.
Како се грижите за растенијата во текот на зимата?
– Растенијата кои се издржливи на ниски температури остануваат надвор и не бараат нега, освен кроење. Останатите ги сместуваме внатре и негата е отприлика еднаш месечно. Ги сместуваме во зависност од условите кои им се потребни, светла просторија, сончеви зраци, топлина. Бараат многу простор и затоа во иднина планираме да им изградиме посебна стаклена просторија само за нив.
Еден градинарски совет за оние кои сакаат да почнат со одгледување цвеќиња и од кои цвеќиња да почнат…
– Секој поединец си го избира цвеќето во завиност од сопствените афинитети и просторни услови. За двор, одличен избор би била лавандата која не мрзне и го краси дворот цела година, а во лето го исполнува со пријатен мирис од опојните виолетови цветови. Секако, најважно е на цвеќињата да им се пружи многу љубов бидејќи тие тоа го чувствуваат и возвраќаат со своите божествени мириси и раскошни бои.
Инаку, Венера е членка на Фејсбук групата …ДВОРЧЕТО…, група која ви ја препорачуваме да си станете член и да се изнагледате преубави објави!
УЖИВАЈТЕ ВО ФОТОГАЛЕРИЈАТА:
Фото: Приватна архива
