Нов мистериозен метален монолит „никна“ на врв на планина во Калифорнија, една недела откако слична структура во непристапна област во пустина во американската држава Јута го задржа вниманието на милион луѓе ширум светот, пишува Гардијан.
Неколку дена подоцна, монолитот од Јута исчезна преку ноќ, а следниот ден слична метална плочка беше забележана и во Романија, но завчера исчезна и оттаму.
Локалниот весник од малиот град Атаскадеро во централна Калифорнија пишува дека ваков мистериозен монолит бил забележан на врвот на планината Пајн, каде стотици луѓе се искачиле за да го видат и да споделат фотографии на социјалните медиуми.
„Огромна тространа метална плочка, висока 3,5 метри „никна“ на врвот од планината.“, пишува локалниот медиум.
И овој монолит е во слична големина со оние што претходно беа забележани во пустината во Јута и Романија.
Сепак, за разлика од „братучедот“ монолит во Јута, што беше убаво закотвен меѓу карпите, монолитот на врвот од планината Пајн бил „лабав“, односно малку се нишал, па локалниот весник пишува дека доколку некој се обиде да го бутне, најверојатно струкутрата ќе падне.
