„Слободен печат“ деновиве е под сериозни хакерски напади кои се обидуваат да го срушат и да го намалат сообраќајот на нашата веб платформа.
Серверот на „Слободен печат“ е во Република Франција од каде што добивме и писмени докази за ваквите „дидос“ напади кои изминативе денови се се поинтензивни.
„Дидос“ нападите не се непозната практика во светот, па и кај нас, но она што е особено интересно е што за првпат во Македонија се случува нападите, покрај од други ај пи адреси, да се вршат и од ај пи адреси регистрирани токму во нашата земја. Според информациите кои ги добивме од нашиот сервер, нападите кон „Слободен печат“, организирано и во исто време, доаѓаат и од ај пи адреси на две владини институции, една ај пи адреса на државна високообразовна институција, како и од две ај пи адреси на големи приватни компании кои имаат свои медиумски екстензии.
Како медиум кој веќе шест години е етаблиран и докажан на медиумскиот пазар, не би сакале да се сомневаме дека хакерските напади се координирани од еден центар и наменски.
„Слободен печат“ нема да остане глув на ваквите напади и веќе реагираше до сите надлежни институции, вклучително и до Секторот за компјутерски криминал и дигитална форензика при МВР, со цел да ги заштитиме своите морални и материјални интереси.
Се надеваме дека институциите наскоро ќе одговорат на нашите барања.
The post „Слободен печат“ деновиве е под сериозни хакерски напади кои доаѓаат од земјава и од странство appeared first on Слободен печат.
