Бугарија денеска прогласи вонредна состојба на територијата на цела држава, откако во земјата се регистрирани 23 случаи на заболени од коронавирус. Од утре, па во наредните 14 дена, ќе работат само бензиските станици, аптеките и продавниците за храна. За време на вонредната состојба, патувањето до и од земји со голем процент на заразени ќе биде забрането, училиштата и универзитетите ќе бидат затворени, а на полицијата ќе и биде дозволено да интервенира за да ги изолира заразените лица.
Македонци кои живеат во градот Пазарџик, во изјава за Слободен печат велат дека во градот завладеал тотален хаос и паника. Граѓаните масовно денеска пазареле во маркетите и се снабдувале со намирници. Од утре, како што им било соопштено се ќе биде затворено, освен маркетите, бензиските и аптеките. Тие ни испратија и фотографии од продавниците во Пазарџик.
– Кај народот завладеа паника. Стотици граѓани чекаа во ред во продавниците. Од утре ни кажаа дека во маркетите ќе пуштаат само по пет луѓе, додека другите ќе чекаат надвор. Денеска по 18 часот се беше затворено. Улиците се пусти. Луѓето не излегуваат од дома – велат нашите соговорници.
Сопствениците на приватни фирми велат дека не знаат како ќе ги истуркаат следните 14 дена, никој не им кажал како ќе и м се покријат загубите.
The post МАКЕДОНЦИ ВО БУГАРИЈА: Од утре ќе работат само маркетите, аптеките и бензиските, луѓето во редици чекаат за намирници (ФОТО) appeared first on Слободен печат.
