Францускиот претседател Емануел Макрон (43) и неговата сопруга Брижит Maкрон (67) на мета се на остри критики откако излегоа информации дека потрошиле речиси 600.000 евра на цвеќе за време на пандемијата, пренесува „Дејли меjл“.
Претседателската двојка овие пари ги потрошила лани за Елисејската палата, нивната официјална резиденција во Париз. Ова значи дека нивниот буџет за цвеќе е петпати поголем од буџетот на нивните претходници Франсоа Оланд и Никола Саркози.
Француската јавност е шокирана од трошењето на претседателот и неговата сопруга во време кога земјата се бори да закрепне од финансиските последици од пандемијата на коронавирусот. Владата на Макрон вети 100 милијарди евра за закрепнување на економијата.
Елисејската палата потрошила речиси 20.000 на растенија, исто толку на орхидеи, нешто повеќе од 30.000 на зеленило и уште 398.000 на исечени цвеќиња за букети. Забележано е и дека буџетот за цвеќе нагло се зголемил токму во времето кога Елисејската палата беше затворена за јавноста, а поради пандемијата, имало малку приеми.
Во септември беше објавено дека неодамнешното украсување на Златната соба во Елисејската палата чинело 927.000 евра, пари што се финансирани од даночни обврзници на Франција.
