Српската инфлуенсерка Зорана Јовановиќ, попозната како Зоранах, се огласи на социјалните мрежи по историскиот натпревар на нејзиниот сопруг, голманот на репрезентацијата на Курасао, Елој Рум. Рум на натпреварот против Еквадор, кој заврши без голови (0:0), забележа дури 15 одбрани на Светското првенство, што претставува рекорд за 90 минути игра на мундијалите.
Во емотивна објава, Зоранах ги сподели гордоста и стресот што ги доживувала за време на натпреварот.
„Каква неверојатна ноќ, љубов! Секогаш велеше дека вакви вечери се случуваат само еднаш во кариерата. Таква вечер ти се случи во 2019 година против Хондурас. Шеснаесет одбрани, што и денес е рекорд во историјата на Голд купот. Секогаш ми беше жал што не сум била таму кога освојуваше титули и доживуваше вакви моменти. Велеше дека Светското првенство е врвот на сè“, напиша таа.
Таа додаде дека Рум е пресреќен што настапува на Мундијалот и што на 37-годишна возраст повторно испишува историја.
„Најмногу одбрани во 90 минути во историјата на Светските првенства! Отсекогаш знаев за кого сум се омажила, но сега конечно и целиот свет може да го види тоа. Изгубив 15 години од животот. Мислев дека ќе добијам срцев удар, но вредеше. Засекогаш ќе бидам горда на тебе, на начинот на кој го правиш тоа и на сè што значиш за овој тим. Канзас, ти благодарам за најубавата вечер во нашите животи“, порача таа.
Емоциите ја совладале на трибините, па во еден момент и заплакала. По натпреварот гордо позирала со својот сопруг, кој во рацете го држел трофејот.
Единствениот голман со повеќе одбрани на еден натпревар на Светско првенство во модерната ера е Тим Хауард. Тој во 2014 година против Белгија забележа 16 одбрани, но по продолженија.
На Рум му недостигаше само една одбрана за да го собори и тој апсолутен рекорд. Сепак, во таборот на карипската репрезентација по натпреварот владееше исклучиво гордост поради историскиот успех.
