Принцезата Марта Луиз од Норвешка се повлече од своите кралски должности за да се фокусира на сопствениот бизнис со алтернативна медицина со нејзиниот вереник Дурек Верет, пренесува The Guardian.
„Принцезата се откажува од улогата на кралски повереник и засега нема да го претставува кралското семејство“, се вели во официјалното соопштение на палатата.
Во исто време, според желбата на нејзиниот татко, кралот Харалд, принцезата Марта Луиз ќе ја задржи титулата.
Палатата објави и дека по свадбата на принцезата Марта Луиз, нејзиниот сопруг, американскиот исцелител Дурек Верет, ќе стане член на кралското семејство, но нема да добие титула и нема да ја претставува монархијата.
Правото да се вика Нејзиното кралско височество Марта Луиз го загуби во 2002 година, кога реши да работи како видовита. Во 2019 година, таа се согласи да не ја користи кралската титула комерцијално.
Во соопштението на палатата се вели дека двојката се согласила да не ја покажуваат својата поврзаност со норвешкото кралско семејство преку нивните социјални медиуми, комерцијални проекти и медиумски производи. Претставниците на кралското семејство истакнаа дека високо го ценат норвешкиот здравствен систем и важноста на потврдените медицински истражувања.
Во истото соопштение од палатата, самата принцеза Марта Луиз ѝ кажа на јавноста дека ја разбира важноста на „знаењето засновано на истражување“.
„Меѓутоа, мислам дека постојат компоненти на добар живот и физичко и ментално здравје кои можеби не е лесно да се сумираат во истражувачки извештај“, додаде принцезата.
