Проектот „Македонијо во срце те носиме“ на публиката ѝ подари уште една преубава македонска песна во изведба на Панчо и Андреј од ДНК и Наум Петрески.
Со „Послушајте патриоти“ се затвора кругот од 12 песни, 12 изведувачи, но стартува новото поглавје – концертниот караван во чии рамки ќе се одржат концерти во осум македонски града.
„На наше големо задоволство, „Послушајте Патриоти” за нас е една несекојдневна соработка со нашиот добар пријател Наум Петрески, кој според нас е најдобриот македонски машки фолк вокал. За аранжманот беше задолжен маестралниот Николче Мицевски, а идејата и поканата дојде од страна на проектот „Македонијо во срце те носиме” на кои Панчо и Андреј не можеа да останат рамнодушни – поготово кога станува збор за Македонија и нешто кое треба да остане во наследство со генерации. Со оглед на летната турнеја и многубројните ангажмани не успеавме да ја визуелизираме оваа песна, што не значи дека тоа нема да се случи во многу блиска иднина. Се надеваме дека ќе ви се допадне и дека нема да ве разочараме, а ние со вас ќе се дружиме и заеднички ќе ја пееме песната преку караванот со сите останати колеги“, порача ДНК на социјалните мрежи.
