Носталгијата ја одбележа првата полуфинална вечер на „Дора“ (националниот избор на песна за Евровизија во Хрватска), а најсилниот впечаток го остави Данијела Мартиновиќ, која по речиси три децении повторно застана на истата сцена што ѝ донесе една од најголемите победи во кариерата.
Во 1998 година таа триумфираше со „Neka mi ne svane“ и ја претставуваше Хрватска на Евровизија во Бирмингем, каде што го освои петтото место. Токму тој период го врати во живот и оваа година – не само со изведбата на евровизискиот хит, туку и со изборот на гардероба.
Мартиновиќ се појави во долг син фустан, истиот што го носеше на победничката Дора пред 28 години. Модниот детал веднаш беше забележан од публиката и водителката Барбара Колар, која во живо посочи дека пејачката и денес може да го облече истиот фустан од 1998 година. „Тоа е тој фустан!“, потврди Данијела, предизвикувајќи аплауз во салата.
Таа објасни дека низ годините често ја подарувала облеката, но оваа креација одлучила да ја зачува без посебна причина – сè до моментот кога повторно ѝ се укажала можност да ја носи на истата сцена.
