Важна недовршена работа му останала на Андреј од „ДНК“ пред да загине во пожарот во Кочани на 16 март.
Емотивна приказна за познатиот пејач, раскажа екипата на „К-15“, заедно со Ико Каров, режисерот и сценарист на документарниот филм „К-15: Од другата страна“, кој беше промовиран минатиот викенд. Андреј Ѓорѓиески беше дел од тимот и дел од продуцентите на филмот. Ико Каров ја раскажа целата приказна за Андреј во емисијата „Еден на Еден“.
– Среде снимање беше многу голем шок беше дефинитивно за нас. Се сеќавам, ми се јави директорот на фотографија и ми вика: „Да ти кажам, ама полека, напиј се една вода. Андреј уште се нема појавено во целата приказна“.
И тука ме удри првиот што се вели „штрафцигер во бубрег“. Му викам: „Друже, го знаеме нашиот, до крај не се дал, и отишол да спаси сѐ што може да спасува. И така и беше. И тоа беше еден дел кој што му стави мала запирка на филмот.
Десет дена потоа јас не можев да отидам на монтажа. Јас кога и да го пуштав филмот, бев тивок, па и не ни можев да продолжам искрено – рече Ико Каров, а на ова се надоврза Бранко Огњановски.
– Слава му. И тој многу му се радуваше на филмот и помагаше, се вложи. Навистина ми е жал генерално за него и за фамилијата и жал ми е што не успеа да се види – рече Огњановски.
– Мене целото негово семејсство ми е особено драго. Целото негово семејство беше на премиерата, и поширокото и потесното. И ним им е многу драго, и во контакт сме. Тоа е уште една емотивна нишка, не само за филмот, туку и за нас лично – рече Ико Каров.
