Тејлор Свифт (35), која пред неколку дена го издаде новиот албум „The Life of a Showgirl“, гостуваше во емисијата на „Би-би-си Радио 2“ кај Скот Милс. Во интервјуто, Милс ѝ постави изненадувачко прашање, дали планира да престане да се занимава со музика откако ќе се омажи за својот вереник, Тревис Келси (36), пренесува „Ел“.
Свифт со насмевка, но и доза на шок, одговори дека тоа е навистина навредливо прашање и дека луѓето не се венчаваат за да дадат отказ од работата. Таа призна дека слушнала за шпекулациите меѓу фановите, кои се загрижиле дека по свадбата ќе се повлече од сцената, но додаде дека го сака човекот со кој е токму затоа што тој го сака тоа што го прави.
„Тој ја почитува мојата уметност, мојата страст и тоа е најубавото нешто кај Тревис, и самиот е толку посветен на својата работа, што нашата страст кон она што го правиме нè поврзува“, рече Свифт.
Пејачката истакна дека најубавото нешто е што можат да се поддржуваат еден со друг, иако нивните професии се толку различни, но сепак имаат и многу заедничко.
Што се однесува до свадбата, Свифт вели дека не брза и дека сè прави чекор по чекор, моментално фокусирана на музиката. Инаку, новиот албум веќе руши рекорди, пред излегувањето биле направени над 63 милиони нарачки, со што е надминат успехот на минатогодишниот проект „The Tortured Poets Department“.
