Популарниот српски пејач Саша Ковачевиќ, кој на почетокот на јуни тајно се венчаше со својата долгогодишна партнерка Зорана Тасовац, наскоро ќе стане татко. Парот во ексклузивно интервју за магазинот „Hello“ откри дека очекува машко дете, истакнувајќи дека се пресреќни што ќе добијат син.
Пејачот призна дека веста за бременоста на сопругата се обидувале да ја сокријат од јавноста одреден период за сè да помине во најдобар ред, но откако информацијата протекла, сфатиле дека е апсурдно да ја демантираат вистината.
Иако нивната венчавка беше организирана во строга тајност, на социјалните мрежи брзо испливаа видеоснимки од нивниот прв танц и од моментот веднаш по изговарањето на судбоносното „да“. За оваа свечена прилика, невестата избра елегантна бела венчаница од чипка со цветни мотиви, додека Саша носеше класичен црн костим.
Инаку, Зорана од претходниот брак ја има ќерката Искра, за која Саша во повеќе наврати со многу љубов изјави дека ја доживува и ја нарекува како свое родено дете, нагласувајќи дека таа секогаш ќе остане неговото прво дете, дури и кога ќе го добие своето биолошко синче.
