Поп-ѕвездата Јелена Карлеуша предизвика лавина реакции на социјалните мрежи откако остро ги искритикува колешките Александра Пријовиќ, Теа Таировиќ и Марија Микиќ, поради тоа што се појавиле во бунди од природно крзно на концертот на Емина Јаховиќ во Сава центар.
Карлеуша, која со години јавно се декларира како жесток противник на користењето природно крзно и како заштитничка на животните, не го криеше револтот откако во јавноста се појавија фотографии од познатите пејачки во луксузни бунди.
„Само грди жени носат вистинско крзно! Убавите и благородни жени носат вештачко крзно, затоа што имаат милост кон животните и ги сакаат животните. Само грди жени, и однадвор и однатре, мислат дека ако закачат мртва животна на себе и се накитат со нејзиното крзно, ќе станат убави. Всушност, ќе станат уште погрди. Милоста кон животните е одраз на благородност, здрав разум и човечност. На оваа фотографија има збир од грди и глупави жени, без мозок и без срце“, напиша Карлеуша во својата објава.
Нејзините зборови брзо се проширија на социјалните мрежи и предизвикаа поделени реакции – дел од јавноста ја поддржа поради ставот против природното крзно, додека други ја обвинија за навреди и преминување на границата на јавна критика.
Да потсетиме, Емина Јаховиќ синоќа одржа голем концерт во Сава центар, кој се претвори во вистинска музичка забава. Меѓу гостите имаше бројни колеги од естрадата, како и сопруги и партнерки на познати спортисти, а најрасположени во публиката, според присутните, биле токму Александра Пријовиќ и Теа Таировиќ.
