„Ролинг стоунс“ и Пол Макартни снимија песна за новиот албум на легендарната рок група, потврди нејзиниот портпарол. Ова следува откако сајтот „Вараети“ вчера објави дека Макартни свири бас гитара на претстојниот албум на „Стоунс“.
Снимањето било неодамна во студио во Лос Анџелес, а според „Вараети“ некогашниот тапанар на „Битлс“, Ринго Стар, би можел да свири на албумот.
„Макартни гостува како басист на една песна од новиот албум, што ќе излезе подоцна оваа година. Ринго Стар не учествуваше во снимањето“, изјави портпаролот на групата.
Тоа ќе биде прв албум на „Ролинг стоунс“ без тапанарот Чарли Вотс, кој почина во 2021 и воопшто прв албум на групата од „Blue & Lonesome“ од 2016.
