Целиот капацитет на арената „Тодор Проески“ е распродаден за помалку од 12 часа за концертот на француската музичка ѕвезда Дејвид Гета, кој на 8 септември ќе настапи во Скопје по повод 35 години од независноста на Македонија.
Од „Авалон продукција“ соопштија дека биле продадени сите 50.000 влезници, а интересот за настанот бил далеку поголем од очекуваниот.
Според организаторите, повеќе од 250.000 луѓе, голем дел во ист момент, се приклучиле на платформата avalonbooking.mk, што предизвикало потешкотии при логирањето и купувањето билети кај дел од корисниците.
„Побарувачката евидентно го надмина капацитетот и бројот на достапни влезници“, велат од „Авалон“.
Организаторите најавија дека сите што успешно резервирале место за концертот ќе ги добијат своите ПДФ-влезници најдоцна до 17 мај, бидејќи во тек е процесирањето на 50.000 билети.
Интересно е што најголемиот дел од влезниците завршиле кај домашната публика. Според статистиката што ја објавија организаторите, 93 проценти од билетите се продадени на корисници од Македонија, а само 7 проценти на посетители од странство.
Билетите за концертот чинеа симболични 35 денари, во чест на 35-годишнината од независноста. Тоа значи дека од продажбата на 50.000 билети биле собрани нешто помалку од 30.000 евра.
Останатиот дел од трошоците за организацијата на спектаклот ќе се покрива од државниот буџет, но Владата сè уште не открива колку вкупно ќе чини прославата.
Иако концертот беше официјално најавен на заедничка прес-конференција на Владата и „Авалон продукција“, досега не се објавени детали за финансиската конструкција, ниту има јавен оглас за организација на настанот, како што беше пракса во претходните години.
Од Владата претходно порачаа дека подготвуваат „достојно, репрезентативно и современо“ одбележување на Денот на независноста, со настан од меѓународен карактер и продукција „од највисоко ниво“.
