Илјадници обожаватели беа очајни откако организаторите на концертот потврдија дека настапот на светски познатата американска пејачка Тејлор Свифт нема да се одржи, поради планираниот терористички напад. Австриските медиуми дознаа за што точно се работи, откако во средата наутро во Долна Австрија беа уапсени две лица.
Како што дознава Хеуте, веста за апсењата во Терниц кај Нојнкирхен станала позната дури вечерта, околу 22 часот, кога и официјално бил откажан концертот. Утрото целата населба беше опколена, а десетици жители од безбедносни причини мораа да ги напуштат домовите. Дека операцијата е поврзана со концертот на Тејлор Свифт потврдија и генералниот директор за јавна безбедност Франц Руф и началникот на виенската полиција Герхард Пурстл.
Во рамките на акцијата за апсење, извршен е претрес на куќата на 19-годишниот маж кој е уапсен, при што се одземени одредени предмети, како и пронајдените „хемиски материи“. Момчето наводно работело за хемиска компанија, а наводно е од Македонија. Според неофицијални информации, неколку недели претходно се заколнал на лојалност на терористичката организација Исламска држава (ИД), а соседите за медиумите изјавиле дека неодамна забележале промена во однесувањето на младиот човек.
Своите планови за терористички напад наводно ги споделил со друг симпатизер на ИД преку смс пораки, а полицијата заклучила дека токму на концертот можел да биде изнеден нападот, според неговите пребарувања. Дотичниот 17-годишник истиот ден бил уапсен во Виена, но засега не се знае како точно бил вмешан во целиот план. Наводно е вклучен и трет млад човек, но тој моментално е во бегство.
