На денешен ден, 25 јануари 1981 година, е роден Тоше Проески, македонски пејач кој со својата музика и со хуманата мисија што ја живееше остави длабока и трајна трага во современата македонска култура.
Тодор „Тоше“ Проески е роден во Прилеп, а израснал во Крушево, во влашко семејство кое имало значајно влијание врз неговото воспитување и вредносен систем. Уште од најрана возраст покажал музички талент, а првите јавни настапи ги имал како дете, меѓу кои и настапот на фестивалот „Златно славејче“ во 1992 година во Скопје. Формалното музичко образование го стекнал во музичкото училиште во Битола, а подоцна и на Музичката академија во Скопје.
Неговата професионална кариера започнува во 1997 година, кога победува на фестивалот „Мелфест“ во Прилеп со изведба на песната „Yesterday“ од „Битлси“. Истата година настапува и на „Макфест“ со композицијата „Пушти ме“, со што го привлекува вниманието на пошироката јавност. Песните „Пушти ме“ и „Остани до крај“ го најавуваат неговиот потенцијал, додека настапот на Скопскиот фестивал во 1999 година со „Твоите бакнежи на моите бели кошули“ се смета за клучен момент во неговиот уметнички подем.
Во 1999 година го издава својот прв албум „Некаде во ноќта“, по што следи период на засилена концертна активност и студиска работа. Во 2000 година учествува на „Скопје фест“ со песната „Солзи прават златен прстен“, а истата година го промовира и албумот „Синот Божји“, кој содржи дел од најпознатите песни во неговиот опус. Во наредниот период, неговата кариера се развива и надвор од границите на Македонија, со изданија и настапи на регионалната сцена.
Еден од најзначајните моменти во неговата кариера е победата на „Беовизија“ во 2003 година со песната „Чија си“, со што се позиционира меѓу најпопуларните поп-изведувачи на Балканот. Во 2004 година ја претставува Македонија на Изборот за песна на Евровизија во Истанбул со песната „Life“, англиската верзија на „Ангел си ти“, и го освојува 14. место во финалната вечер.
Во текот на својата кариера, Тоше Проески соработува со бројни истакнати автори и изведувачи од Македонија и од регионот, меѓу кои Григор Копров, Жељко Јоксимовиќ, Леонтина Вукомановиќ, Марина Туцаковиќ, Миро Буљан, Антонија Шола и Тони Цетински. Неговата дискографија вклучува неколку студиски албуми, од кои „По тебе“ се издвојува како едно од најуспешните поп-изданија на балканскиот музички пазар.
Во 2004 година Проески беше именуван за Амбасадор на добрата волја на УНИЦЕФ, а во тој контекст ја сними и песната „За овој свет“, која стана препознатлив симбол на неговиот хуман ангажман. До крајот на својот живот одржа бројни хуманитарни концерти, а неговиот последен голем настап се одржа на 5 октомври 2007 година на Градскиот стадион во Скопје, во поддршка на образованието.
Тоше Проески трагично го загуби животот на 16 октомври 2007 година во сообраќајна несреќа кај Нова Градишка, во Република Хрватска. Посмртно беше прогласен за заслужен граѓанин на Македонија, а 17 октомври 2007 година беше прогласен за Ден на национална жалост.
