65-годишна Јапонка му поверувала на некој измамник дека нема пари за повратен билет од вселената и му испратила 30.000 долари за да се спушти на Земјата, односно во нејзините прегратки, локалните медиуми во Јапонија ја објавија оваа неверојатна приказна.
Парот почнал да се допишува преку Инстаграм на 28 јуни, а измамникот успеал да ја убеди наивната жена дека е руски астронаут стациониран на Меѓународната вселенска станица.
Потоа почнал да покажува емоции и да ѝ изјавува љубов, а кога таа се фатила на мамката и се израдувала на неговото ветување дека ќе дојде во Јапонија да ја земе за жена, тој ѝ кажал дека само еден мал проблем ги дели од олтарот, односно, дека нема пари за повратен билет.
Така вљубената жена почнала да му праќа пари, но кога во рок од дваесет дена ја извршила петтата уплата, ѝ паднало на памет дека во целата приказна можеби има нешто сомнително.
Тогаш побарала помош од полицијата и ја дознала болната вистина – дека нема на што да се надева и дека во вселената не постои човек кој едвај чека да влезе во ракета и да ја напушти микрогравитациската средина поради неа.
Инаку, како што пренесува весникот „Јомиури“, жртвата поверувала во измамата поради фотографиите од вселената кои самопрогласениот астронаут ги објавувал на својот профил, а импресионирана била и од тоа што знаел да ги именува вселенските агенции како НАСА и ЈАКСА.
