Пејачката Марија Шерифовиќ, која на Србија ѝ ја донесе единствената победа на Евровизија во 2007 година со песната „Молитва“, во едно интервју се присети на огромниот страв и паниката што ги преживеала зад сцената. Иако пред камерите изгледаше самоуверено, таа откри дека моментите пред самиот настап во полуфиналето биле вистински хорор за неа.
Марија опиша дека станала свесна за можната победа дури по првото полуфинале, чија снимка ја погледнала повеќе од триесет пати. Сепак, моментот кога останала сама на скалите пред да излезе на бината го опишува како најстрашните три минути во нејзиниот живот. Додека го чекала својот ред, се соочила со силни физички реакции од стрес – сува уста, мачнина и чувство дека не може да издржи.
Најголемиот страв на пејачката бил да не се обрука пред јавноста. Како што самата вели, размислувала што ќе прави ако погреши нешто во изведбата, бидејќи чувствувала дека не може да се врати дома по таков неуспех. Тој краток од до бината ѝ изгледал неверојатно тежок, но во моментот кога ја зазела позицијата под светлата, стравот исчезнал и започнала нејзината моќна изведба.
Паралелно со сеќавањата на Марија, деновиве внимание привлекува и српската група „Лавина“, која се пласираше во финалето на овогодинешната Евровизија. Тие настапуваат токму на денот кога Марија победи во 2007 година, што за многумина има голема симболика. Членовите на групата изјавија дека сè уште не стапиле во контакт со Шерифовиќ, но се надеваат дека таа ќе им се јави кога ќе има прилика. Тие додадоа дека се полни со енергија и подготвени да го дадат својот максимум во финалната вечер.
