Регионалните медиуми продолжуваат да објавуваат нови детали за здравствената состојба на пејачката Мина Костиќ, откако претходно беше објавено дека е хоспитализирана во Специјалната болница за психијатриски болести „Д-р Лаза Лазаревиќ“.
Според информации што ги пренесуваат српските медиуми, повикувајќи се на извори блиски до пејачката, Костиќ во последниот период наводно се соочувала со тежок облик на депресија, предизвикан од приватни и професионални проблеми. Изворот тврди дека разделеноста од нејзиниот партнер Мане Ќурувија Каспер, кој живее во САД, дополнително влијаела врз нејзината психичка состојба.
Во меѓувреме, нејзини соседи за медиумите изјавиле дека забележале промени во нејзиното однесување во последните недели и дека изгледала повлечено и нерасположено. Сепак, овие тврдења не се официјално потврдени.
Според истите извори, Каспер веднаш отпатувал за Србија по информацијата за нејзината хоспитализација. Медиумите објавија дека тој пристигнал во Белград и се обидел да добие информации за нејзината состојба.
Сестрата на пејачката, Биза, изјавила дека нема информации за случувањата и дека подолго време немала контакт со Мина.
Засега нема официјално соопштение од семејството или од медицинските установи за здравствената состојба на пејачката, а лекарите не даваат коментари поради заштита на приватноста на пациентите.
