Сопственикот на францускиот производител на луксузни стоки LVMH, Бернар Арно за еден ден изгуби 10,39 милијарди евра, јавуваат странските медиуми.
И покрај оваа загуба Арно и натаму е најбогатиот човек на светот, а неговото богатство се проценува на 178,12 милијарди евра.
Разликата меѓу него и вториот најбогат човек на светот, шефот на „Тесла“ и Твитер, Илон Маск, се намали на 11,13 милијарди евра.
Арно, наведената сума пари, наводно ја изгубил вчера по значителниот пад на цените на акциите.
Берзите во САД бележат пад, а најмногу загуби бележи секторот на луксузни производи.
Акциите на компанијата „Луј Витон“ паднаа за 5,0 отсто, а на компанијата Керинг, сопственик на „Гучи“, за 2,97 отсто.
Пазарите се загрижени поради несигурната побарувачка за луксузни стоки во САД.
