Познатиот американски кошаркар Мајкл Џордан донираше 10 милиони долари на хуманитарната организација „Make-A-Wish“ во пресрет на неговиот 60-ти роденден.
Тоа е најголемата поединечна донација во 43-годишната историја на организацијата.
-Во изминатите 34 години, ми беше чест да се здружиме со „Make-A-Wish“ и да помогнам да им донесеме насмевки и среќа на толку многу деца. Нивната сила и издржливост за време на толку тежок период во нивните животи навистина беа инспирација“, изјави шесткратниот шампион во НБА, кој во петок го слави својот 60-ти роденден.
Поранешниот играч на Чикаго и Вашингтон, сега сопственик на Шарлот Хорнетс, во 1989 година ја поддржа оваа организација која им помага на децата со тешки болести.
Тој беше именуван за главен амбасадор на организацијата во 2008 година, поради неговото „влијание што го менува животот на децата и нивните семејства“.
-Не можам да замислам подобар роденденски подарок од тоа да видам како другите ми се придружуваат во поддршката на „Make-A-Wish“ за секое дете да ја доживее магијата на остварување на желбата, изјави Џордан.
