Лепа Брена стекнала огромно богатство во текот на својата кариера, но веќе со децении не се откажува од еден мал бизнис од кој, според сè, и понатаму добро заработува.
Станува збор за киоск за брза храна, кој пејачката го има веќе 33 години, поточно од 1993 година. Брена е сопственичка на мал киоск на Булеварот на ослободувањето во центарот на Нови Сад, каде се продаваат плескавици и друга брза храна.
Пејачката никогаш јавно не зборувала за ова, а ниту граѓаните на Нови Сад не биле информирани дека киоскот е во нејзина сопственост.
„Иако сите знаат дека Брена ја продаде ‘Гранд продукција’, ретко кој знае дека таа има друг бизнис, на кој сега очигледно повеќе му се посветила. Во центарот на Нови Сад го поседува тој локал, каде се продаваат плескавици и друга брза храна, па тоа ѝ доаѓа како дополнителна работа“, изјавил извор близок до пејачката за „Српски телеграф“.
Се наведува дека бизнисот сега повторно оди добро, а многу корисници на „Тикток“ го посетуваат локалот и се фотографираат пред него.
Сепак, пејачката извесен период работела со загуба. Како што пишувал „Курир“ во 2019 година, овој бизнис не одел најдобро, бидејќи според податоците од Агенцијата за стопански регистри, во 2013 година киоскот, регистриран како микро претпријатие со 6 вработени, забележал загуба од 870.000 динари. Во следните години состојбата не се подобрила значително, па Брена ја завршила 2015 година со загуба од 438.000 динари, а 2017 година со загуба од 1.421.000 динари.
Единствено остварила приход во 2018 година, кога според достапните податоци од Агенцијата за стопански регистри заработила 42.000 динари, додека во 2016 година приходот изнесувал 21.000 динари.
