Фолк пејачката Зорица Брунцлик, која е присутна на сцената со децении и се смета за една од најголемите ѕвезди на фолк музиката во регионот, пред четири години доби српска национална пензија – признание кое, како што вели таа, многу ѝ значело, иако не му придава материјално значење, пишува Story.hr.
Интересно е што националната пензија на Зорица ѝ „избегала“ уште во 2013 година, иако многумина верувале дека таа одамна го заслужува ова признание поради нејзиниот голем придонес во културата и музиката. Сепак, правдата на крајот била задоволена.
Националната пензија во Србија се доделува во износ од една просечна плата без даноци и придонеси, што за уметниците во просек изнесува 73.114 динари (околу 624 евра).
По тој повод, Зорица даде кратка изјава и откри како живее денес:
„Пензионирана сум како истакнат уметник. Многу сум привилегирана. Бог ме благослови да бидам талентирана, да ја работам работата што ја сакам, да можам добро да заработувам од неа и сите околу мене да живеат добро. Тоа е вистинска привилегија. Нашата професија е единствената професија, покрај свештениците, која може да си ја врши својата работа дури и по пензионирањето, додека те служат грлото и нозете“, истакна Зорица Брунцлик.
