Најголемиот кинески пазар на прехранбени производи, „Синфади“ во Пекинг, прекина со продажба и складирање на разладено и смрзнато месо и морска храна, поради новооткриените случаи на коронавирус поврзани со овој вид храна.
Британските медиуми, повикувајќи се на кинески портали, пренесуваат дека на пазарот „Синфади“ ги отстрани производите, дезинфицира над 100 фрижидери и ја исклучи електричната енергија во нив.
Раководството на пазарот наведува дека ќе спроведува дневни прегледи во магацините и ладилниците за овошје и зеленчук.
Одлуката е донесена откако неколку работници кои ракувале со замрзнати производи во градовите Кингдао и Тијанџин се заразиле со коронавирусот, иако во Пекинг досега немало локална трансмисија на вирусот.
Кина го засили тестирањето на замрзна храна, откако во неколку наврати беше откриено дека коронавирусот се наоѓа во производите и во нивната амбалажа, што резултира со масовно тестирање на храната и персоналот.
