На годинашното 80. издание на филмскиот фестивал во Венеција наградите за најдобра женска и машка улога ги понесоа американските актери.
Кејли Спени ја освои наградата за улогата на поранешната сопруга на кралот на рокот, Елвис Присли, во филмот „Priscilla“ (Присила), а Питер Сарсгард беше прогласен за најдобар актер за својата улога во бруталната семејна драма „Memory“ (Меморија).
Филмскиот маратон во Венеција годинава не беше проследен со вообичаената парада на филмските ѕвезди на црвениот килим, кои поради долгиот штрајк на актерите во Холивуд, не дојдоа да ги промовираат своите остварувања.
Актерите и сценаристите бараат подобрување на своите договори и ограничување на употребата на вештачката интелигенција, на што укажа и актерот Сарсгард во своето обраќање пред присутните.
