Обожавателите на принцезата од Велс веруваат дека таа исчезнала од очите на јавноста со причина. А, фотошопот на нејзината последна семејна фотографија само долеа масло на огнот.
Принцезата Кејт последен пат беше видена во јавност кога ја поздрави толпата откако присуствуваше на божиќната утринска служба во Сандрингем. Тоа беше 25 декември 2023 година. Таа потоа беше подложена на операција на абдоменот и сега се опоравува од операцијата, според Бакингемската палата. Но, обожавателите на принцезата од Велс веруваат дека нејзиното семејство крие што навистина се случува. А неодамнешната семејна фотографија на Кејт Мидлтон само ги потврди нивните стравови, пишува „Вокс“.
Принцезата Кејт Мидлтон, која еден ден ќе стане Кетрин, кралицата на Обединетото Кралство, конечно се појави во јавноста по операцијата. На 10 март, палатата Кенсингтон дистрибуираше фотографија од принцезата од Велс како позира насмеана со своите деца во чест на Денот на мајката во Велика Британија. Оваа фотографија требаше да биде втора од двете јавни појавувања на Кејт по Божиќ, но набргу по објавувањето на фотографијата, таа беше одбележана со скандал. Неколку големи фотоагенции, вклучувајќи ги АП и Ројтерс, заклучија дека сликата е „изманипулирана“, па оттука следеа и извинувања дури и, наводно, од самата принцеза.
Следниот ден, на 11 март, беше објавено извинување на твитер-профилот на принцот и принцезата од Велс: „Како и многу аматери фотографи, експериментирам со уредување од време на време. Би сакал да изразам извинување за каква било конфузија предизвикана од семејна фотографија што ја споделивме вчера. Се надевам дека сите што слават имаа одличен Ден на мајката“. Објавата беше потпишана со буквата „К“ во чест на Кетрин.
Подоцна истиот ден, Кејт беше фотографирана како го напушта замокот Виндзор. Кејт се возела во автомобилот до принцот Вилијам, но нејзиното лице беше речиси невидливо и непрепознатливо, па така лесно можеше да се појават сомнежи дали воопшто тоа е Кејт.
Фотографијата од недела е една од двете фотографии на Кејт што јавноста ги виде во последниве месеци. Таа беше фотографирана на 4 март во автомобил управуван од нејзината мајка Керол Мидлтон во близина на замокот Виндзор. Неколку месеци претходно, една од најфотографираните жени во светот, чиј што цел живот беше во центарот на вниманието откако стана колеџ-пријателка на принцот Вилијам, очигледно исчезна од очите на јавноста.
На 17 јануари, Кенсингтонската палата објави дека Кејт била примена во болница еден ден претходно на рутинска операција на абдоменот. Во извештајот се вели дека „не е веројатно“ таа да ги продолжи своите јавни должности пред (католички) Велигден, кој се паѓа на 31 март оваа година.
Кејт засега се држи до својот претходно објавен распоред. Палатата Кенсингтон на 29 јануари објави дека таа се вратила дома од болница. Сепак, долгата пауза на Кејт во јавните настапи и недостатокот на конкретни информации за нејзиното здравје создадоа плодна почва за теории на заговор. Кога принцот Вилијам го откажа својот закажан настап на 27 февруари, наведувајќи „лична работа“, гласините уште повеќе се разгореа.
Во меѓувреме, Палатата одговори на различните гласини, објаснувајќи за списанието Пипл дека Кејт „закрепнува добро“.
Повеќето теории на заговор можеби звучат чудно, но сите тие одговараат на вистински проблем. Кејт долго време е сигурен столб на британското семејство, се појавува и се насмевнува на секој јавен настан, одговарајќи на драмата на кралското семејство смирено и достоинствено. Затоа, не е ни чудо што нејзиното исчезнување предизвика толкава возбуда.
Официјално, Кејт била во болница на рутинска операција на абдоменот. Сепак, скептичните набљудувачи на ситуацијата речиси веднаш се нафрлија на очигледното несовпаѓање во првата изјава на Кенсингтонската палата за нејзиното здравје на 17 јануари. Ако операцијата на Кејт била „планирана“, обожавателите на принцезата сакаат да знаат зошто палатата исто така соопштила дека таа ги „одложува претстојните состаноци“ доколку процедурата била планирана и зошто тие не биле откажани порано.
Изненадувачки беше и тоа што Кејт ќе се опоравува од операцијата околу две недели. Некои абдоминални операции може да бидат и малку посериозни, како што е апендектомија, но овие процедури не бараат толку долг престој во болница. Каква операција направила Кејт поради која неможеше да се врати дома две недели?
Гласините уште повеќе се засилија кога Бакингемската палата истиот ден објави дека кралот Чарлс ќе се лекува од зголемена простата. Беше невообичаено, речиси шокантно, двајца толку високи членови на кралското семејство да се подложат на медицински процедури во исто време. Кралските набљудувачи шпекулираа дека палатата се обидува да скрие нешто.
И сега кралот Чарлс се врати на информативното поле, па дури и додека се лекува, учествува во официјални настани. Што се однесува до Кејт, палатата Кенсингтон само кратко рече дека нејзината состојба „не е поврзана со рак“. Зошто, прашаа кралските набљудувачи, состојбата на Кејт беше многу помистериозна од онаа на кралот?
Колку повеќе време минуваше без фотографија од Кејт, толку повеќе се зголемуваа гласините. Вилијам бил фотографиран за време на посетата на болницата, но никој не ја видел Кејт како ја напушта болницата и се враќа во својот дом во Виндзор. Таа на Инстаграм не објави ниту една фотографија од опоравувањето, а ниту едни папараци не успеаја да ја „уловат“.
Во нормални околности, отсуството на фотографии на жена која се опоравува од медицинска процедура би се сметало за разумно почитување на нечија приватност. Сепак, животот на идната англиска кралица не се карактеризира со обични околности. Во земја со озлогласено безмилосен таблоиден печат, кралското семејство се смета дека треба да има „фер игра“ кон граѓаните, како и сите други личности кои се на функција.
А обожавателите исто така беа вознемирени од исчезнувањето на принцезата од Велс бидејќи по раѓањето на секое од нејзините три деца, Кејт се појавуваше пред болницата во полна форма, дури и нашминкана, за фотосесија на папараците и тоа во рок од 24 часа, а секојпат тоа го правеше со весела насмевка. Што беше различно за оваа конкретна процедура? Што ја спречи Кејт да сака да го покаже своето лице и што ја спречи печатот да бара да го види? Зошто палатата на крајот одлучи да објави јасно фотошопирана фотографија од неа?
„Дали ми кажуваш дека на Кејт Мидлтон – истата жена која позираше надвор од болница како супермодел само неколку часа по породувањето – наеднаш и требаа месеци закрепнување пред да го покаже своето лице? И британскиот печат сега магично ја почитува приватноста? Ова изгледа … застрашувачки?“, напиша еден фан на принцезата на Х, сумирајќи го општиот скептицизам.
На луѓето им е чудно исчезнувањето на Кејт бидејќи тоа е спротивно на нејзиниот веќе изграден имиџ. Сè додека беше во очите на јавноста, Кејт Мидлтон беше постојано „доверлива и издржлива“.
Доследноста беше толку јасно во фокусот за имиџот на Кејт во јавноста што печатот во различни моменти покажа дека е нејзината најхеројска карактеристика.
Уште на самиот почеток на врската со принцот Вилијам, кога печатот ѝ го даде погрден прекар „Кејти Вејтинг“, госпоѓицата Мидлтон беше љубезна со папараците. Со нив не одржувала пријателски односи, како што тоа го правела покојната принцеза Дијана во одредени периоди од нејзината кариера, но не се трудела да ги надмудри. Таа знаеше што сакаат и тоа им го овозможуваше.
Претходно, кралската новинарка Тина Браун напиша дека еднаш папараците биле на должност пред продавницата во која работела Кејт додека таа и Вилијам се забавувале. Нејзиниот шеф ја прашал дали сака да избега од задната врата, но Кејт одговорила: „Искрено, ќе не бркаат додека не не фотографираат. Па зошто да не отидам да се фотографирам, а потоа тие да не остават сами.”
